II.

PRIMA SALVTATIO

PVER,   PATER,   MATER,   ISABELLVLA.

Pu.    Salvus sis mi pater, salve mea matercula, precor vobis felicem hunc diem germanuli, propitium vobis opto Christum sororculae.
Pa.    Mi fili, sospitet te Deus, evehat ad ingentes virtutes.
Ma.  Servet te Christus, mea lux. Quid agis mea dulcedo? quî vales? quomodo nocte hac quievisti?
Pu.    Recte valeo et placide dormivi.
Ma.  Christo gratias: proprium hoc velit tibi esse.
Pu.    Ad mediam tamen noctem excitatus sum e dolore capitis.
Ma.  Me perditam et miserrimam! quid narras? qua parte capitis?
Pu.    Ad brechma.
Ma.  Quamdiu?
Pu.    Vix octava parte horae: postea redormivi nec sensi amplius.
Ma.  Respiravi, nam exanimaras me.
Pu.    Bene sit tibi Isabellula, para mihi ientaculum. Ruscio, Ruscio huc, canicule festivissime, en ut cauda adulatur, ut se in posteriores pedes erigit. Quomodo habes? quomodo vales? Heus, adfer panis bucceam unam aut alteram, quam ei demus: videbis lusus scitissimos. Non esuris? nihilne edisti hodie? Profecto plus est in cane isto intelligentiae, quam in illo mulione crasso.
Pa.    Tulliole mi, libet mihi tecum paulisper confabulari.
Pu.    Quid, mi pater? nam nihil mihi accidere potest suavius, quam te audire.
Pa.    Hic tuus Ruscio est belua an homo?
Pu.    Belua, ut credo.
Pa.    Quid tu habes cur sis homo, non ille? tu edis, bibis, dormis, ambulas, cursitas, lusitas: haec ille facit omnia.
Pu.    Atqui ego sum homo.
Pa.    Quomodo id cognoscis? quid tu nunc habes plus quam canis? sed hoc interest, quod ille non potest homo fieri: tu potes, si vis.
Pu.    Obsecro mi pater, effice id primo quoque tempore.
Pa.    Fiet, si eas quo eunt beluae, redeunt homines.
Pu.    Ibo pater multo libentissime. Sed ubi id est?
Pa.    In ludo litterario.
Pu.    Nulla est in me ad rem tantam mora.
Pa.    Nec in me. Isabellula, audin? da huic ientaculum in cistella.
Is.     Ecquidnam?
Pa.    Frustum panis butyro illitum, vel ficos aridas aut uvas passas pro obsonio, sed insolatas[1]: nam alterae illae viscosae inficiunt puerorum digitos et vestes. Nisi malit cerasa aliquot, vel pruna aurea et oblonga. Insere brachiolum cistulae, ne excidat.