Magister & Puer
Magister. Veni, puer! disce sapere.
Puer. Quid hoc est, Sapere?
Magister. Intelligere recte, agere recte, et eloqui recte omnia necessaria.
Puer. Quis docebit me hoc?
Magister. Ego, cum DEO.
Puer. Quomodo?
Magister. Ducam te per omnia. Ostendam tibi omnia. Nominabo tibi omnia.
Puer. En adsum; duc me in nomine DEI.
Magister. Ante omnia debes discere simplices Sonos, ex quibus Sermo humanus constat; quos Animalia sciunt formare, et tua Lingua scit imitari, et tua Manus potest pingere. Postea ibimus Mundum, et spectabimus omnia. Hic habes alphabetum vivum et vocale.
